ᱵᱟᱝ ᱫᱚᱢ ᱛᱟᱦᱮᱸ ᱠᱟᱱ ᱵᱚᱸᱜᱟ ᱵᱟᱝ ᱫᱚᱢ ᱛᱟᱦᱮᱸ ᱠᱟᱱ ᱪᱟᱸᱫᱚ ᱢᱟᱹᱱᱢᱤ ᱨᱩᱯ ᱨᱮᱢ ᱩᱯᱮᱞ ᱞᱮᱱᱟ ᱫᱷᱟᱹᱨᱛᱤ ᱛᱟᱞᱟ ᱨᱮ᱾ ᱥᱟᱹᱜᱩᱱ ᱞᱮᱱᱟ ᱵᱟᱹᱭᱥᱟᱹᱛ ᱠᱩᱱᱟᱹᱢᱤ ᱢᱟᱹᱦᱤᱛ ᱫᱚ ᱛᱟᱦᱮᱸ ᱠᱟᱱ ᱐᱕/᱐᱕/᱑᱙᱐᱕ ᱫᱷᱩᱲᱤ ᱫᱷᱟᱹᱨᱛᱤᱢ ᱞᱮᱵᱮᱫ ᱞᱮᱫᱟ ᱵᱟᱵᱟ ᱥᱤᱫᱚ ᱢᱩᱨᱢᱩ ᱟᱭᱳ ᱛᱤᱠᱤᱱᱟᱜ ᱫᱩᱞᱟᱹᱲ ᱜᱷᱟᱨᱚᱸᱡᱽ ᱨᱮ᱾ ᱟᱹᱛᱩ ᱧᱩᱛᱩᱢ ᱰᱟᱦᱟᱨᱰᱤ/ ᱰᱟᱸᱰᱵᱩᱥ ᱵᱷᱚᱸᱡᱽ ᱫᱤᱥᱚᱢ ᱛᱟᱞᱟ ᱨᱮ ᱱᱤᱛ ᱫᱚᱵᱚᱱ ᱢᱮᱛᱟᱜ ᱠᱟᱱᱟ ᱢᱚᱭᱩᱨᱵᱷᱚᱸᱡᱽ , ᱳᱰᱤᱥᱟ ᱯᱚᱱᱚᱛ᱾ ᱥᱮᱨᱣᱟ ᱨᱮᱱᱟᱜ ᱨᱟᱭᱨᱤᱛ ᱜᱚᱲᱚᱢ ᱵᱟᱵᱟ ᱧᱩᱛᱩᱢ ᱛᱟᱦᱮᱸᱱ ᱫᱩᱞᱟᱹᱲ ᱛᱮᱠᱚ ᱧᱩᱛᱩᱢ ᱞᱮᱫ ᱢᱮ ᱪᱩᱱᱩ ᱢᱩᱨᱢᱩ ᱜᱮ᱾ ᱪᱮᱫᱽ ᱨᱮᱪᱚ ᱵᱟᱝ ᱜᱟᱱ ᱞᱮᱱ ᱵᱚᱸᱜᱟ ᱵᱳᱨᱳ ᱠᱚ ᱩᱥᱟᱹᱫᱽ ᱮᱱ ᱫᱚᱦᱲᱟ ᱛᱮᱠᱚ ᱧᱩᱛᱩᱢ ᱠᱮᱫ ᱢᱮ ᱟᱢ ᱫᱚ ᱨᱟᱹᱜᱷᱩᱱᱟᱛᱷ ᱢᱩᱨᱢᱩ᱾ ᱦᱮᱢᱼᱦᱚᱵᱚᱨ, ᱪᱟᱪᱚᱼᱰᱤᱰᱤ ᱟᱢ ᱫᱚᱢ ᱦᱟᱨᱟ ᱭᱮᱱ ᱥᱤᱞᱟᱹᱴᱼᱠᱷᱩᱲᱤ ᱥᱟᱵᱽ ᱠᱟᱛᱮ ᱮᱦᱚᱵ ᱠᱮᱫᱟᱢ ᱚᱞᱚᱜ᱾ ᱜᱟᱹᱢᱵᱷᱟᱹᱨᱤᱭᱟᱹ ᱚᱞᱚᱜ ᱟᱥᱲᱟ ᱟᱢ ᱠᱚ ᱵᱷᱮᱡᱟ ᱠᱮᱫ ᱢᱮ ᱢᱚᱱᱮ ᱨᱮᱢᱟ ᱟᱭᱢᱟ ᱠᱩᱠᱞᱤ ᱟᱢᱟᱜ ᱨᱟᱠᱟᱵᱽ ᱮᱱᱟ᱾ ᱮᱴᱟᱜ ᱪᱤᱠᱤ, ᱮᱴᱟᱜ ᱯᱟᱹᱨᱥᱤ ᱢᱟᱪᱮᱛ ᱮᱴᱟᱜ ᱡᱟᱹᱛᱤ ᱪᱮᱫ ᱠᱚᱪᱚᱭ ᱨᱚᱲᱮᱫ ᱠᱟᱱᱟ ᱵᱟᱪᱚᱢ ᱵᱩᱡᱷᱟᱹᱣ ᱞᱮᱱ᱾ ᱚᱱᱛᱚᱨ ᱢᱚᱱᱮ ᱩᱭᱦᱟᱹᱨ ᱟᱢᱟᱜ ᱜᱩᱱᱤᱵᱷᱟᱹᱵᱤ ᱨᱮᱢ ᱛᱟᱦᱮᱸᱭᱮᱱ ᱟᱭᱳᱼᱵᱟᱵᱟ ᱴᱷᱮᱱ ᱠᱩᱠᱞᱤ ᱟᱢᱟᱜ ᱟᱭᱢᱟ ᱛᱟᱦᱮᱸᱭᱮᱱ᱾ ᱚᱠᱛᱚ ᱯᱟᱨᱚᱢ ᱥᱟᱶᱼᱥᱟᱶᱛᱮ ᱛᱮ ᱟᱢ ᱦᱚᱸᱢ ᱦᱟᱨᱟᱭᱮᱱ ᱟᱢᱟᱜ ᱠᱩᱠᱞᱤ ᱟᱢ ᱜᱮᱢ ᱛᱮᱞᱟᱭ ᱵᱷᱮᱸᱭᱟᱬ ᱛᱟᱞᱟ ᱛᱮ ᱥᱤᱸᱜᱤᱼᱧᱤᱫᱟᱹ ᱵᱷᱟᱹᱵᱤᱛ ᱨᱮᱜᱮ ᱟᱢ ᱫᱚ ᱛᱟᱦᱮᱸᱭᱮᱱ᱾ ᱧᱤᱫᱟᱹ ᱡᱟᱹᱯᱤᱫ ᱠᱩᱠᱢᱩ ᱨᱮ ᱟᱢ ᱫᱚ ᱢᱮᱱᱟᱢ ᱜᱷᱩᱲ ᱨᱮ ᱥᱮᱨᱢᱟ ᱥᱚᱨᱚᱜ ᱠᱷᱚᱱ ᱛᱟᱨᱟᱥ ᱡᱷᱟᱞᱠᱟᱣᱮᱱ ᱟᱬᱜᱚ ᱭᱮᱱ ᱠᱤᱱ ᱵᱤᱫᱩᱼᱪᱟᱸᱫᱟᱱ ᱥᱮᱯᱮᱧ ᱠᱟᱛᱮ ᱚᱞ ᱟᱠᱷᱚᱨ ᱟᱢᱟᱜ ᱥᱟᱢᱟᱝ ᱨᱮ᱾ ᱪᱚᱢᱠᱟᱣ ᱠᱟᱛᱮᱢ ᱮᱵᱷᱮᱱᱮᱱᱟ ᱵᱟᱝ ᱫᱚ ᱠᱩᱠᱢᱩ ᱵᱟᱝ ᱫᱚ ᱥᱟᱹᱨᱤ ᱟᱢ ᱫᱚ ᱫᱤᱥᱟᱹᱦᱟᱨᱟ ᱵᱷᱮᱸᱭᱟᱬ ᱠᱟᱛᱮᱢ ᱩᱭᱦᱟᱹᱨ ᱠᱮᱛ ᱠᱤᱱ ᱵᱚᱸᱜᱟ ᱵᱤᱫᱩᱼᱪᱟᱸᱫᱟᱱ ᱠᱩᱠᱢᱩ ᱫᱚ ᱵᱟᱝ ᱥᱟᱹᱨᱤᱭᱟᱜ ᱜᱮ ᱟᱢ ᱠᱤᱱ ᱞᱟᱹᱭ ᱟᱫ ᱢᱮ᱾ ᱛᱤ ᱨᱮ ᱱᱚᱱᱚᱞ ᱥᱟᱵᱽ ᱠᱟᱛᱮ ᱫᱩᱲᱩᱵ ᱮᱱᱟᱢ ᱚᱼᱚᱞ ᱵᱚᱸᱜᱟᱼᱵᱚᱨᱚ ᱵᱷᱮᱸᱭᱟᱬ ᱠᱟᱛᱮ ᱚᱞ ᱠᱮᱫᱟᱢ ᱟᱠᱷᱚᱨ᱾ ᱵᱚᱸᱜᱟ ᱟᱬᱟᱝ ᱛᱟᱨᱠᱚ ᱭᱮᱱᱟ ᱟᱢᱟᱜ ᱨᱤᱫᱟᱹᱭ ᱨᱮ ᱚᱱᱟᱠᱷᱚᱱ ᱜᱮ ᱧᱩᱛᱩᱢ ᱠᱮᱫᱟᱢ ᱚᱞ ᱫᱚ “ᱚᱞ ᱪᱤᱠᱤ”᱾ ᱵᱚᱭᱦᱟᱼᱢᱤᱥᱤ, ᱜᱟᱛᱮᱼᱡᱚᱴᱟᱣ ᱥᱟᱱᱟᱢ ᱥᱚᱸᱜᱮ ᱠᱟᱛᱮ ᱵᱤᱦᱟᱨ, ᱵᱮᱝᱜᱚᱞ, ᱟᱥᱟᱢ, ᱩᱰᱤᱥᱟ ᱜᱚᱴᱟᱢ ᱫᱟᱬᱟ ᱞᱮᱫ᱾ ᱛᱦᱮ ᱳᱣᱟᱸᱜ ᱵᱟᱵᱟ ᱴᱷᱮᱱ ᱠᱩᱠᱞᱤ ᱟᱢᱟᱜ ᱪᱟᱸᱫᱟᱱ ᱵᱷᱮᱸᱭᱟᱬ ᱠᱟᱛᱮᱢ ᱩᱭᱦᱟᱹᱨ ᱠᱮᱛ ᱠᱤᱱ ᱩᱰᱤᱥᱟ ᱚᱠᱟ ᱨᱮᱫᱚ ᱥᱟᱹᱜᱩᱱ ᱫᱟᱨᱟᱢ ᱯᱮᱨᱮᱡ ᱞᱚᱴᱟ ᱫᱟᱜ ᱚᱠᱟ ᱨᱮᱫᱚ ᱴᱮᱠᱟᱣ ᱫᱟᱨᱟᱢ ᱡᱚᱛᱚᱢ ᱥᱟᱦᱟᱣ ᱞᱮᱫ᱾ ᱵᱚᱸᱜᱟᱼᱵᱚᱨᱚ ᱛᱷᱩᱢ ᱫᱟᱲᱮ ᱟᱢ ᱴᱷᱮᱱ ᱛᱟᱦᱮᱸ ᱠᱟᱱ ᱨᱤᱠᱤᱲ ᱢᱚᱱᱮ ᱠᱟᱹᱢᱤ ᱟᱢᱟᱜ ᱛᱟᱹᱦᱩᱸ ᱠᱮᱴᱮᱡ ᱞᱮᱱ᱾ ᱚᱱᱚᱬᱦᱮᱸ, ᱥᱮᱨᱮᱧ, ᱜᱟᱭᱟᱱ ᱢᱤᱫᱩᱱ ᱛᱟᱞᱟ ᱛᱮ ᱩᱯᱮᱞ ᱟᱠᱟᱱ “ᱚᱞ ᱪᱤᱠᱤ” ᱜᱚᱴᱟᱢ ᱯᱟᱥᱱᱟᱣ ᱞᱮᱫ᱾ ᱚᱞ ᱞᱮᱫᱟᱢ ᱚᱞ ᱪᱮᱢᱮᱫ, ᱵᱤᱫᱩᱼᱪᱟᱸᱫᱟᱱ,ᱠᱷᱮᱨᱣᱟᱞ ᱵᱤᱨ, ᱫᱟᱲᱮ ᱜᱮ ᱫᱷᱚᱱ, ᱦᱤᱛᱟᱹᱞ ᱟᱨᱦᱚᱸ ᱟᱭᱢᱟ ᱯᱩᱛᱷᱤ᱾ ᱟᱢᱟᱜ ᱚᱱᱟ ᱯᱩᱛᱷᱤ ᱛᱮᱦᱮᱧ ᱤᱛᱩᱱ ᱟᱥᱲᱟ ᱨᱮ ᱦᱟᱱᱮ ᱵᱤᱨᱫᱟᱜᱟᱲ ᱨᱮ ᱢᱮᱱᱟᱜ ᱯᱟᱹᱴᱷᱩᱣᱟᱹ ᱛᱟᱞᱟ ᱨᱮ᱾ ᱚᱞ ᱟᱢᱟᱜ ᱚᱞ ᱪᱤᱠᱤ ᱨᱚᱲ ᱟᱢᱟᱜ ᱥᱟᱱᱛᱟᱲᱤ ᱟᱢᱟᱜ ᱨᱚᱲ ᱛᱮᱦᱮᱧ ᱨᱟᱡᱽᱟᱹᱨᱤ ᱨᱮ ᱦᱟᱱᱮ ᱫᱤᱥᱚᱢ ᱛᱟᱞᱟ ᱨᱮ᱾ ᱟᱢᱫᱚ ᱛᱮᱦᱮᱧ ᱢᱮᱱᱟᱢᱟ ᱪᱟᱸᱫᱚ ᱤᱯᱤᱞ ᱛᱟᱞᱟ ᱨᱮ ᱟᱢᱟᱜ ᱧᱩᱛᱩᱢ ᱰᱤᱜᱽᱰᱤᱜᱟᱹᱜ ᱠᱟᱱ ᱫᱷᱟᱹᱨᱛᱤ ᱛᱟᱞᱟ ᱨᱮ᱾ ᱛᱷᱩᱢ ᱟᱞᱮ ᱢᱮ, ᱟᱞᱮ ᱥᱩᱛᱩᱜ ᱠᱟᱞᱮ ᱢᱮ ᱪᱤᱠᱤ ᱥᱟᱶᱦᱮᱫ ᱦᱟᱨᱟ ᱨᱟᱠᱟᱵ ᱨᱮ ᱜᱚᱲᱚ ᱮᱢᱟ ᱞᱮᱢ ᱟᱢᱟᱜ ᱛᱷᱩᱢ ᱮᱢᱟ ᱞᱮᱢ᱾
ᱚᱜᱼᱚᱞᱤᱡᱺ ᱭᱚᱥᱳᱫᱟ ᱢᱩᱨᱢᱩ ᱱᱟᱣᱟ ᱫᱤᱞᱞᱤ ᱥᱚᱛᱟᱺ ᱚᱣᱟᱝ ᱪᱟᱸᱫᱚᱠᱤᱭᱟᱹ ᱤᱼᱯᱟᱛᱷᱟᱢ, ᱩᱪᱷᱟᱹᱱᱼ᱑, ᱵᱟᱹᱭᱥᱟᱹᱛᱼ᱒᱐᱒᱑